Starfsemi Vísindasmiðjunnar

Háskóli Íslands leggur áherslu á að glæða áhuga ungs fólks á vísindum og fræðum og hefur staðið fyrir margs konar verkefnum í þeim tilgangi. Vísindasmiðja Háskóal Íslands leikur þar lykilhlutverk en sem dæmi um önnur verkefni sem miða að sama marki má þar nefna Háskóla unga fólksins, Vísindavefinn og Háskólalestina.

Markmið smiðjunnar er að efla áhuga ungmenna á vísindum og fræðum með gagnvirkum og lifandi hætti og styðja þannig við kennslu á sviði náttúru- og raunvísinda. Heimsóknir í Vísindasmiðjuna eru grunnskólum að kostnaðarlausu og hafa viðbrögð skóla og umsagnir verið með eindæmum góð.

Staðsetning

Vísindasmiðjan er staðsett í norðurenda Háskólabíós við innganginn sem snýr að Hagatorgi. Í Vísindasmiðjunni er góð aðstaða fyrir skólahópa; rúmgott svæði fyrir yfirhafnir og töskur, notalegt athvarf til að borða nesti og gott aðgengi. Margir strætisvagnar nema staðar á háskólasvæðinu; við Hringbraut, Suðurgötu, Hagatorg og víðar.

Heimsóknir

Vísindasmiðjan hefur tekið á móti hópum af öllum stigum frá leikskólum upp í framhaldsskóla en heimsóknirnar nýstast best nemendum í 6. til 10. bekk grunnskóla. Enginn aðgangseyrir er í Vísindasmiðjuna og er þjónustan skólum landsins að kosnaðarlausu.

Opið er fjóra daga vikunnar: þriðjudaga, miðvikudaga, fimmtudaga og föstudaga. Skráning heimsókna fer fram hér á síðunni. Hámarksstærð hópa er 30 einstaklingar og varir heimsóknin um 90 mínútur.

Við komu er hópnum skipt í tvennt. Annar helmingurinn fær þá kynningu á ákveðnu efni (vísindaheimspeki, jarðfræði eða stjörnufræði) á meðan hinum eru kynnt nokkrar uppstillingar sem í Vísindasmiðjunni leynast. Eftir 30 mínútur skipta hóparnir um stað og svo fá þeir saman frjálsan tíma síðustu 30 mínúturnar.

Starfsfólk

Ari Ólafsson
Forstöðumaður og leiðbeinandi
Áshildur Jónsdóttir
Leiðbeinandi
Baldur Brynjarsson
Leiðbeinandi
Baldur Helgi Þorkelsson
Leiðbeinandi
Guðný Halldórsdóttir
Leiðbeinandi
Jón Gunnar Þorsteinsson
Leiðbeinandi
Katrín Lilja Sigurðardóttir
Leiðbeinandi
Margrét Gunnarsdóttir
Umsjónarmaður og tengiliður
Margrét Stefanía Þorkelsdóttir
Leiðbeinandi
Martin Swift
Leiðbeinandi
Olga Sunneborn Guðnadóttir
Leiðbeinandi
Sara Högnadóttir
Leiðbeinandi
Snæbjörn Guðmundsson
Leiðbeinandi
Sævar Helgi Bragason
Leiðbeinandi

Saga Vísindasmiðjunnar

Vísindasmiðja Háskóla Íslands var opnuð vorið 2012 í Háskólabíói og hefur verið nánast fullbókað frá fyrsta degi.

Vísindasmiðjan er að hluta grundvölluð á veglegri gjöf frá Orkuveitu Reykjavíkur, sem afhenti Háskóla Íslands allan þann búnað og tæki sem áður tilheyrðu Rafheimum í Elliðaárdal og notaður var til fræðslu skólabarna. Háskólinn tók við gjöf Orkuveitunnar með fyrirheit um að búnaður og tæki yrði notað áfram til fræðslu ungmenna og yrðu hvati að fjölbreyttum og lifandi kennsluaðferðum.